من غير عنوان :)

-ومن غير صورة كمان - :P
أزيكم ؟ :)
الموضوع وما فيه إنه
بسبب وضع والدى فى المنطقة ، بيتعرض عليه مشاكل كتير أوى هو ووالدتى ،وبالتأكيد غالبا بنكون عارفين بيها وبنشوفهم وكده
 ومن كمية الاستشارات التى رأيتها والمشاكل و"الخناقات" و و و 

أولاً أغلبها زوجية ..-للأسف-
والمشاكل ديه معظم الأسباب اللى شوفتها وسمعتها : 

 الاختيار الخطأ من الأول خالص .. وأغلبه من النساء ، فيه خطوط عريضة وحاجات معينة ماينفعش بأى حال من الأحوال تتنازلى عنها فى شريك حياتك -ونفس الشئ بالنسبة للشاب-!
عشان بعد كده بتيجى تعيطى وتقولى ياريت اللى جرى ما كان ! 

مافيش حاجة إسمها ضل راجل ولا ضل حيطة ..
 ده من أكتر الأمثلة السفيهه اللى سمعتها !
 لا ضل الحيطة أحسن لو هترتبطى بشخص لا يناسبك ! 

- أولاً دينه وخلقه طبعاً  -يبقى مش بيصلى - وده ماينفعش أصلا الزواج منه واللى تتزوجه تبقى بتستهبل عشان اللى مش بيؤدى فرض ربه ماتجيش تبقى عاوزاه يؤدى واجباته نحوك ! -  

مش تتزوجيه مُدخن بعدين تشتكى وتقولى هو وعدنى إنه يبطل !
 لأ يا ماما متضررة من التدخين مكنتيش قبلتيه من الأول . 

-يبقى بخيل وتقول مش مشكلة ..
 بيمشى مع بنات هو وعدنى إنه يبطل وإنه خلاص آخر واحدة فى حياته 

- تبقى هى جامعية وهو مش بيعرف يقرأ ويكتب ! لييييه ؟؟؟؟
 ازاى متوقعة انه يفهمك ؟
 ده غير إنه فيه منهم بيبقى عنده عقدة نقص ويطلع فيكِ عقده ويحاول يكسرك عشان متحسيش او هو مايحسش إنك أعلى منه فى حاجة ! 

وطبعا من اكبر الاسباب اللى تخليها توافق وتتغاضى عن حاجات زى كده هو : 

1- ضغط الأهل 

2- الخوف من نظرة المجتمع "والعنوسة" - وهو نفسه المجتمع اللى مش هيرحمك لما تحملى إسم مطلقة ! - 

3- عاوزة تبقى أم وخلاص 

4- متأثرة بالأحلام الوردية بتاعة الأفلام 

5- مخدوعة بإسم الحب ! 

6- مش فاهمين يعنى إيه زواج أصلا ! 

~ 

وآخر نقطة تخلينا ننتقل لموضوع آخر وهو " إحنا ليه بنتزوج ؟ وليه بنبحث عنه ؟ وليه بننتظره ؟ " 

للأسف مجتمعنا بيأصل فكرة عند البنات إن الزواج ده هو الحل الوحيد لكل حاجة هى عاوزاها   وإنه مثواها الأخير وإنه لو ما أتزوجت يبقى هى لاشئ وخلاص مالهاش فايدة فى الحياة !  
ماما عاوزة أخرج > لما تتجوزى خلى زوجك يخرجك
ماما عاوزة أشترى لبس جديد > لما تتجوزى خلى جوزك يجبلك
ماما عاوزة أتفسح مع اصحابى > لما تتجوزى ابقى اتفسحى مع جوزك
أى حاجة لااازم يربطوها بيه !
طيب خلاص ماما جوزينى !
 ليييييييييه ؟؟
وفى الآخر طبعا لما هتزوج مش هتلاقى اللى بتحلم بيه ومش هتلاقى اللى ينفذ أحلامها وطلباتها وتبدأ المشاكل .

أصلا هو الزواج هدف ولا وسيلة ؟؟؟؟؟ 

كتير بتعاملوا معاه على إنه هدف وممكن مايكونوش واخدين بالهم أصلا من كده ! - وأنا زمان كنت منهم ! - 

فى الحقيقة إن الزواج مجرد وسيلة لا أكثر ولا أقل ..
وسيلة مهمة نعم ، لكنه مش آخر الدنيا ! 

ولو الوسيلة ديه مش هتوصلنا للهدف يبقى بلاش منها ،
 ولو الوسيلة ديه إحنا معندناش الإستعداد الكامل ليها عشان تساعدنا بجد للوصول للهدف يبقى تتأجل لغاية ما نستعد عشان مانبقاش عبء على نفسنا وعلى النصف الآخر 

إيه الهدف بقى ؟؟ 

طبعاً الهدف الأسمى لكل مسلم ومسلمة  :- الجنة  ورضا ربنا  :) 

وعشان نوصل للجنة محتاجين نعف نفسنا وده عن طريق الزواج 

وعشان مهمتنا فى الأرض هو تعميرها محتاجين نبنى أسرة مسلمة بحق وده بردو عن طريق الزواج
ومافيش رهبانية فى الإسلام 

لو كل شاب وفتاة فهموا كده من الأول واتربوا على كده مش هنوصل فى الآخر للمشاكل اللى مالها نهاية ! 

~ 

وللحديث بقية إن شاء الله :) 

الجواز بداية النهاية !

امممم عاملين ايه ؟
كنت بقرأ كتاب اسمه عايزة اتجوز بيتكلم عن مشكلة العنوسة بس بصراحة كتاب يموووت من الضحك آخر 1000 حاجة ض1
المهم
بنات كتير - وكنت منهم - بتفتكر ان حياتها هتبتدى بعد الزواج ! والحقيقة انها طلعت مش كده ده الزواج ده بداية النهاية !! آه وربنا زى ما بقولكوا كده :D طبعا ده اكتشاف خطييير جدا جدا :))
احم هتقوليلى عرفتى ازاى يا ست رحمة
هقولكم ايه بقى ، لأن أول ما بتتزوج من طبيعة الرجالة عندهم حب التملك وديه مش معلومة جديدة طبعا فهو بيكون كلللل حاجة ليه وبتدور حواليه > حلوه القافية ض1
وكل حاجة لازم تكون بتصب فى مصلحته هو ، وغالبا أو ما بيلاقى او يحس انك بتديتى تتقدمى عليه بتبدأ المشاكل والغيرة والنظرة الدونية ..
زائد ان كل حياتك وهتمامك بيكون لزوجك وعيالك وبتسيبى نفسك انت ! ولو وافق مبدئيا على أى خطة من خططك بيكون قاعد مستنى بالميكرسكوب يجيب أى غلطة ويقولك ده مقصر على بيتك ويديكى موشح من اللى قلبك يحبه فى طاعة الزوج والاهتمام بالبيت والذى منه - طبعا مش بعمم بس الغالب -
ومشاغل الحياة والدنيا بتنسيكى كل حاجة وتحمدى ربنا لو كنتى فاضية تشمى نفسك !
المهم فأحسن حاجة إن الواحدة تخلص كل طموحاتها قبل الزواج عشان بعد كده ماتندمش وتقول ياريت اللى جرى ماكان ! آه والله زى مابقولكم كده :D
طبعا بقول مرة تانية مش بتكلم عموما لان فيه ازواج فعلا ساعدوا زوجاتهم وخلوهم أفضل بس دول موجودين على استحياء كدهون
وبس يعنى :))

سوريا الأبية :"

///
رمزيه للبروفايل الفيس بوك القديم
"ارجو النشر في الفيس بوك , تويتر , في المدونات , في كل مكان ,,"

يااااارب ..
تعلم أن ليس بيدنا شئ لأهل سوريا الأحرار غير الدعاء :"
فاللهم يارب العالمين انتقم من بشار وأعوانه وأخذه أخذ عزيز مقتدر وأرنا فيه يوما أسودا وأنصر اخواننا فى سوريا واربط على قلوبهم وثبتهم واحفظهم وارزقهم بمدد من عندك يقاتلون معهم ..
يارب ليس لنا ولا لأهل سوريا سواك ..
تكالب عليهم أعداء الإسلام
يتموا أبناءهم واعتدوا على نسائهم فاللهم يا جبار يا منتقم أرنا فيهم عجائب قدرتك
واغفر لنا تقصيرنا بحقهم يا رحييم ~

~
الصورتين من تصميم أحد الأخوة جزاه الله خيرا وشكر الله له ~
إن لم نستطع مساعدتهم ماديا ـ فعلى الأقل ندعو لهم ونظهر لنا تضامننا معهم ()
~

بيوت خالية من المشاعر !

بقدر ما نأخذ الأمر بفكاهة ..
بقدر مايحمل الموقف من حزن على حالنا !
حسناً أيعقل أن بيت كهذا سيخرج أبناء أسوياء !
رفقاً بالقوارير قالها رسولنا صل الله عليه وسلم
ونفس الرسالة للنساء ..
بيوتنا أصبحت خالية من المشاعر لا هم لنا غير الأموال و و و
ونسينا أهم شئ
المودة والرحمة والحب ~
* كلمات خرجت رغم عنى

ناس غريبة :/

من كام يوم قرأت موضوع عن الكلام اللى مش "لطيف" هى العضوة كانت كاتبة لفظ تانى مش لطيف بس ماعلينا
فالمهم بتقول نغير الكلام اللى "مش لطيف" لكلام "لطيف"
الخلاصة بقى هى كلمة نعسان او نعسانة ديه كلمة مش لطيفة ؟
وكلمة يالهوى ؟
وكلمة ياعم ؟
وكلمة منديل ؟
ستات فاضية صحيح -_-
مش عارفة ليه التدقيق أوى كده فى كلام عادى ممكن يختلف ع حسب المكان نفسه ؟!
مافيش أحسن من انو يكون الإنسان ع عفويته أيون فى حدود للكلام بس فيه حاجات بيقولها رخمة أوى يعنى !
ممكن يكون كلام بحكم البلد أو البيئة أو كده ليه نحسس الناس انه لازم تدخلى كلمة إنجلش فى كلامك عشان تكون ستايل ووااو !
وبس يعنى :D

الحمدلله

اليوم كانت هناك ندوة لأحد الشيوخ -الشيخ حازم شومان-فى جامعتى
رؤية الشباب والفتيات وإقبالهم ع المحاضرة والاستماع وربما تحمل البعض منهم ممن جاءوا متأخرين الوقوف لساعات والاستماع
لهو ما يفرح القلب ويطيب له الفؤاد
رغم ان المعظم كان من الشباب العادى -يعنى الالتزام- أو أقل من عادى
بعضهم حضر برفقة صديقته ! وهذا نصر أن يأتى هؤلاء الشباب ليحضروا ندوة دينية لأحد شيوخ " السلفية " كما يقال
والله مهما فعلوا فسيظل شبابنا يحمل بين طيات مشاعره حباً لهذا الدين
فى آخر المحاضرة أعلن 4 من الشباب -هؤلاء من أعلنوا أسمائهم فقط وإلا هناك الكثير - أعلنوا توبتهم
وفتاة أعلنت أنها سترتدى النقاب بعد المحاضرة
وهناك من أرسل له علبة سجائر ليعلن توبته
وهناك من تاب من المخدرات
فاللهم لك الحمد والمنة

:]

عندماتعطيك الدنيا ظهرها
ببساطة قل لها
وبكل قوة
















































....
...
هاكووووووونا متاتااااااااااااااا
:D
ايه سامعة حد بيشتم ؟ حد ليه شوق فى حاجة ؟

وااشوقااه ~

لكم فرحنا بخبر فوز جدى وجدتى بقرعة الحج ..
أخيييراً سيتحقق حلمهما خاصة جدتى والتى كانت تحتفظ بمصوغاتها الذهبية وعندما جاء وقت التقديم باعتها جميعاً لتستطيع التقديم ..
والآن جاء خبر تحديد وقت سفرهما
ورغم حزننا لفراقهما وعدم تقضية العيد معهما
إلا إن القلب ينتشى فرحاً لهم ويتمنى لو كان معهم
آآآآآه
هو كالحلم بل أجمل
أن أذهب لتلك الأراضى المقدسة
لأرى الكعبة المشرفة أمامى لا يفصلنى عنها شئ
لأرتوى من ماء زمزم وليس فقط مجرد رشفات أقتسمها مع العائلة من زجاجة مياة صغيرة أحضرها لنا حاج أو معتمر من معارفنا أو عائلتنا ..
ياااااا الله ..
كم يشتاق القلب لها
كم أتمنى أن أحكى أنا عنها ولا أكون تلك المستمعة التى تجلس لتتمتع ب" حكاوى " من أنعم الله عليه بالذهاب هنا ..
يااارب تعلم حالنا ومافى قلبنا من اشتياق
فاللهم لا تحرمنا من الذهاب إليها بذنوبنا
يارب أعلم أنى لو جلست ضعف عمرى لأاجمع الأموال للذهاب لن أستطيع
ولكنى يارب أحسن الظن فيك
وأعلم أنك الغنى الكريم الجواد
تعطى بغير حساب لمن تشاء
تقول للشئ كن فيكون
بيدك مفاتيح ومقاليد الحكم وإن أعطيت لا ينقص ذلك فى ملكك شئ
فاللهم أرزقنى العمرة والحج وجميع المشتاقين
يااااااااااااااااااااااااااااارب
قولوا آمين بالله !

حرام كده

السلام عليكــم ورحمـة الله وبركاتــة ،،
أكتر حاجة بكرهها فى بعض الناس
تجاهل شخص معين
أو التكبر بمعنى أصح
يعنى مش فاهمة هو اللى جاى يكلمك ده جاى يشحت منك مثلا
ده الرسول صلى الله عليه وسلم لما كان حد بيكلمه وده نبى الأمة كلها وعنده مشاغل و و و
أى حد كان بيكلمه بيلتفت ليه بكل جسده وبيهتم بيه بغض النظر عن مركزه أياً كان ..
والله سبحانه عز وجل عاتبه على رجل أعمى فقير !
مثلاً راجل عجوز شكله ع قد حاله يسأله عن الطريق ولا كأنه بيتكلم ولا يبص عليه ويسيبه ويمشى
حد يكون بيتناقش معاه بكل موضوعية يتنرفز عليه ويبصله بإحتقار ويسيبه على أساس إنه أرقى منه ومعتقداته أفضل من التانى والتانى ده مش بيفهم وميستحقش الحياة عشان تعارض مع التانى
" مرة كنت فى الجامعة وبشترى أكل وروحت جبت الأوردر ورايحة عشان أخده بقى وكان معايا واحدة صاحبتى منتقبة برضو والراجل مرضيش يدينا ولا كأنه شايفنا ياعم يا أستاذ يا كابتن آخد اللى ورايا واللى جنبى ومش عاوز يدينى بجد نرفزنى وبصراحة أقعدت أزعق وديه أول مرة تحصل فعلاً انى أعلى صوتى على حد وكل ده عشان كنا منتقبات أنا وصحبتى وكنت ممكن أوى أصعد الموضوع بس قلت بلاش خلينى طيبة أحسن "
ممكن الموضوع ده بينطبق برضو ع المنتديات تلاقى مثلا حد كاتب موضوع وميردش غير ع أصحابه او المشهورين والتانيين ولا كأنهم موجودين بل ممكن يتريق مثلا عليهم او كده
سبحان الله !
يعنى ده بنى آدم وده لأ ؟؟
او مثلاً لو معارض معاه فى رأى أو فكر بعيداً عن مواضيع النقاش مثلا
رد عليه برد عادى فى أى مجال تلاقيه بيتجاهله ويرد على اللى بعديه واللى قبليه وهو لأ
بجد ده كأنك بتوجه طعنة ليه ولكرامته ..
مش من حقك أبداً إنك تشوف نفسك أرقى من ده وأعقل من ده وبتفهم أكتر من ده وفكرك أحسن من ده عشان كده متكلموش ..
ومش من حقك انك تستحقر فلان أو علان عشان فكره ، مركزه ، وظيفته أو أو أو
+
حاجة تانية بنشوفها فى أغلبية الموظفين
تحس انك جاى بتقولهم لله يا محسنين مش انهم بياخدوا مرتب على الشغل ده مش بيعملوه من فضلة خيرهم مثلاً
يعنى هو أنا لازم أكون إنسانه رخمة وأعلى صوتى وأدبح القطة يعنى عشان يمشونى ؟؟؟
+
عارفة اتكلمت كتير بس بجد النقطة ديه مضيقانى أووووى
مافيش أى سبب يخلى الواحد يعامل الناس بطريقة سيئة كده لأن هو مخلوق من اللى هما مخلوقين منه
ربنا يهدينا ويهديهم
~

ذكريات ~

السلام عليكم ورحمة الله
امبارح نزلت الجامعة مع واحدة من صديقاتى المقربات نسأل عن شوية حاجات كده
المهم طبعاً الوقت ده بيكون الطلاب الجدد بيقدموا وبيشوفوا أوراقهم
الواحد افتكر وهو كان زيهم كده من تلت سنين وهو محتاس فى الجامعة
+
الحماسة انه كبر خلاص وبقى إنسان جامعى محترم فى البلد :d
والفرحة ودخول الجامعة كأنه حلم واتحقق وياااه هنعيش أحلى أيامنا
الواحد لما يشوف حاله دلوقتى
بينزلها بالعافية ومش طايق يروح أصلاً
سبحان الله !
ولما اللى أكبر مننا يقوللنا على كده مش نصدقهم ..
ونقول بس نسيب أيام الثانوى
دلوقتى بنحلف بأيام الثانوى ونتمنى نرجع ليها تانى
كل ما الواحد بيعدى مرحلة ويدخل مرحلة تانية يتمنى انه مكنش راحلها
ايييييييييييييييييييييييييه
دنياااااااا
أدينا كبرنا ودخلنا الجامعة وخلاص كلها سنتين ونتخرج ونقول بعديها فينك يا أيام الجامعة ^_^
* صورتى من أمام كلية أداب جامعة القاهرة :)

فكرت تحمد ربنا ع النعمة ديه؟

السلام عليكم ورحمة الله
حد فكر قبل كده يحمد ربنا ....
على نعمة النوم الطبيعى اللى هو من غير أرق وانك تقعد ساعتين تلاتة عقبال ما يجيلك نوم رغم انك بتكون تعبااان :(
تحمده على نعمة انك اول ما تحط راسك ع المخدة تروووح فى النوم وده اللى ناس محرومة منه - الله أكبر ماشاء الله عشان متقولوش بحسدكم :P -
النوم الطبيعى اللى هو تنام بليل وتصحى بالنهار
وتنام من 6 لـــ 8 وتقوم فايق ونشيط
مش تنام 10 ساعات وتقوم كأن كان نايم عليك حيطة :D
دماااغك هتبقى هتنفجر من للاتفكير فاهمين ازاى
اللى هو تكون حاسس ان دماغك مشغول بس من غير حاجة
بجد بجد ربنا ما يوريكم
حاجات كتيييير ماحدش بيحس بنعمتها وفضلها إلا لما يتحرم منها
مجرد حاجة بسيطة زى كده بتقلب كيان الواحد وتخليه مش مركز ونفسيته مش تمام ومتقلبة وهلكان !
يارب أنزل علينا رحمة وسكينة منك يااااارب آمييين
ويلا تصبحوا ع خييير
أشربوا كوباية لبن سخنة وخدوا شاور دافى ومتخلوش المروحة او التكييف على درجة عالية وأحلام سعيدة :D

أوشكت على الانتهاء من الكتاب
يا للحماسة
أريد أن أعرف كيف استطاعت كاميليا المجروحة أن تتغلب ع حزنها بتوقيت النسيان كما تقول أحلام ..
ثم ماذا؟
رجعت إلي معذبها ؟!
رفعت ضغطى فعلاً
حقاً بعض النساء يستمتعن بإظهار الحماقة وإقناع أنفسهن بها بإسم الحب
ما دام أستطاع أن يتركها فى جرحها وعذابها مرة
سيفعلها ألف مرة !
وكل يوم أقتنع بأن هذا الحب الذى يتكلمون عنه ماهو إلا حماقة كبيرة نقنع بها أنفسنا لنستمتع بالعذاب !
ولا يوجد غير حب واحد هو الصادق !
وكلنا نعرفه ..

عاوزة أطييير :)

صدمة !

احم
فيه صدمات بتيجى للواحد كده سبحان الله أحياناً كتيرة -بالنسبة لى - بتخلينى أفكر بطريقة مختلفة
يعنى كل مرحلة فى حياتى كان سبب الانتقال ليها صدمة كبيرة
آخر صدمة رغم ان أولها كان توهان بجد وكنت خلاص حاسة ان شوية عقلى هيطير من الحيرة اللى كنت فيها فى انى كنت زعلانة وفرحانة فى نفس الوقت قلقانة ومطمنة فى نفس الوقت تعرفوش ازاى
وكانت فترة متعبة
بس الصدمة ديه خلتنى أكتشف رحمة جديدة جوايا
يمكن أفكار اختلفت 360 درجة ويمكن من شهرين ولا حاجة كنت من أشد الكارهين لها واللى مش مقتنعين بيها
حتى أهلى لاحظوا كده
خلاص بدأت أفكر فى خطوات لحياة جديدة وبدأت فيها فعلاً
بدأت أمسح كل حاجة ممكن تخلينى أرجع لرحمة القديمة
ولو أى حته أى فكرة صغنتوتة فتفوتة من أفكار رحمة القديمة بحاول بكل طاقتى انى اشيلها واقتلها قتلاً شديداً فظيعاً مريعاً
يمكن مش هتعجب ناس كتير من اللى كانوا متعودين ع القديمة
بس هى عاجبانى ومستريحة نفسياً أكتر بيها
رغم نظرات الاستنكار من أهلى وانهم مش مصدقين انى ديه أنا وان ده كلامى لدرجة انهم بيقولوا شكلها بتمثل وهى جواها لسه فى الافكار بتاعتها
بس لأ خلاص
مش لازم صدمة تانى
الله أعلم هتكون ازاى
ديه والحمدلله عدت بحلوها ومرها وربنا سترها واللهم لك الحمد
فخلاااص
بس من أكتر الحاجات اللى استفدتها
أد ايه ربنااا كرررريم وحلييييم ياااااااااااااه بجد محدش يعرف غير لما يجرب يعيش فى المعانى ديه
واد ايه هو عفو وغفور
سبحان الله
ومع كل اللى بنعمله
وما زال هو أجود الأجودين وأكرم الأكرمين
اللهم لك الحمد كما ينبغى لجلال وجهك وعظيم سلطانك
بس كده شوية كلام كان قلبى وقلت أطلعه

منتقبة بس مش معقدة

حقيقة أنا الحمد لله منتقبة من اولى ثانوى
وكان عن قناعة شخصية خصوصاً ان أهلى ملتزمين الحمد لله
طبعاً الواحد قابل أشكال وألوان من الناس
الوحش والحلو والرخم واللى عاوز قلمين واللى عاوز يتعلق على كوبرى قصر النيل
مش عارفة ليه فيه نظرة إن المنتقبة والملتحى معقدين نفسياً
وميعرفوش حاجة اسمها ضحك او هزار وميعرفوش حاجة اسمها حب
وميعرفوش حاجة اسمها تكنولوجيا وانهم عايشين فى العصر الحجرى
كان مرة اخواتى داخلين كده على منتدى نسائى وكانوا على قسم بتاع المشكلات وكده<<بصراحة انا بكره القسم مش فاهمة يعنى ايه لازمة النكد والواحد يدخل يضايق نفسه وخلاص
المهم فكان واحدة كاتبة مشكلتها انها تقدملها واحد مناسب فى كل شئ مادياً واجتماعياً وتعليمه وكل شئ بس المشكلة العويصة اللى كانت فيها انه
"

ملتزم

"
بتقول ولما قعدت معاه اول مرة تعرف انه الملتحى بيضحك
وشوفى دى بتقول هو بيتكلم نطق اسم "اخته " مكنتش تعرف ان الملتزميين
"بينطقوا اسم الستات على لسانهم"
طبعا الموضوع كان تلتينه ردود زى
"اوعى تتجوزيه ده هيعقدك"
"الملتزمين دول وحشين"،"

دول بيبئوا عنيهم زايغة

" ووووو قائمة من الاتهامات
طبعاً مقدرش أقول ان كلهم ملايكة
لاء فى عدد وليس بالقليل سواء منتقبات او ملتحيين بيعملوا مصايب وبلاوى
بس ليه التعميم ؟؟؟؟

دى النقطة

اشمعنى فى كل حاجة بنقول لا فى حلو وفيه وحش لكن فى ديه لااء كلهم وحشيين
ليه نظن بيهم ظن السوء دايماً
يعنى مثلا أول ما نشوف واحدة منتقبة ماشية مع شاب
تلاقيهم يقولوا بصى ده تلقيهم كذا وكذا !!!
اشمعنى هما بنشوف أخطاءهم بالميكرسكوب ؟!!!
هتقولوا عشان المفروض هما قدوة طيب وهو فيه مجموعة بتبئه كلها زى بعض ؟!
هى المنتقبة معصومة من الخطأ؟!
هى عشان لبست النقاب تبئه المفروض ست الشيخة ؟!
طيب هى عملت حاجة شايفه انها بتقربها من ربنا مش معنى كده انها كاملة فى كل الجوانب التانية !!
والنظرة بئه بتاعة التعقيد..
يعنى مثلاً فى أكتر من موقف نكون مثلاً قاعدين وبنضحك وكده وانا وأخواتى وبنهزر
تيجى واحدة تقول مكنتش اعرف ان المنتقبات كده ؟ انتوا بتضحكوا عادى ؟
وجزء تانى بئه يقولك لاء انت لبستى النقاب يبئه المفروض متضحكيش ازاى تضحكى ؟
والله واحدة قالتهالنا فى المترو كنا مجموعة من المنتقبات وبنضحك وكده وقالتها
يعنى المطلوب مننا ايه ؟
وييييه بئه واحنا لما نروح نشترى الهدوم بنشترى هدوم زى البنات بتلبسها عادى يعنى
تلاقى بئه اللى فى المحل واحدة تيجى تقول بتعملوا بيهم ايه ؟
يعنى هيكون بنعمل بيهم ايه بنحطهم ديكورشن فى الشقة مثلاً
والتانية طب انتوا بتلبسوهم فين ؟
هو احنا ماعندناش عيلة ماعندناش اصحاب
ولا هو لازم ألبسها فى الشارع واتمختر بيها واللى رايح واللى جاى يبص عليا ؟
بجد الواحد يعنى الناس بيحملوه أكتر من طاقته
حاجة تانية
يمكن مالهاش دعوة اوى بالموضوع بس هى بتصب فى الفكرة الأساسية
طبعاً كلنا عارفين المواصلات والى فيها ورخامتها وما إلى ذلك
والواحد لما بيلاقى المكان ضيق وهلاقى راجل هيقعد جنبى بدفع مكانين مكانى والمكان اللى جنبى
دى حريتى الشخصية ودى فلوسى وانا شايفه انه لو راجل قعد جنبى كده حرام عليا وبصراحة بعتبرها خيانة لزوجى "طبعاً اللى لسه معرفهوش "
فبئه تلاقى اول ما ادفع النظرات المستنكرة
ومثلاً الراجل اللى جنبى يحسسنى انى طعنت فى رجولته مثلاً
طب ياعم انا حره مش عاوزاك تلمسنى انته مالك ؟!!
وتلاقى بئه تعليقات
"يعنى انت بس اللى خايفة على نفسك "
" وكلنا اخوات"
و"

اركبى تاكسى

"
رغم انى مش بكون راكبه اتوبيس النقل العام مثلاً، ولا انا طلبت من حد يدفعلى ؟
والله مرة ركبت ودفعت جنبى وجه واحد عاوز يقعد بالعافية قلتله انا دفعت قعد يرغى ويزبد بئه
رغم اننا اولاً كنا صبح وكان فيه ميت عربية ورانا يعنى مش وقت الزحمة
ثانياً كان فيه مكان تانى اودام بس ماكنش عاجبه !
طبعاً فى المواقف اللى زى دى بطلع كل كمية البرود اللى عندى
طب قولولى الواحد يعمل ايه معاهم دول ؟
يااااه أنا كتبت ده كله:प

يالها من كلمة ....

:::::::
::::::::::::::
:::::::::::::::::::

هناك اشخاص نقابلهم فى حياتنا
يكون لهم الاثر العميق فى انفسنا
سواء بالإيجاب او السلب وايضا سواء اكانوا يعلمون هذا او لا
عندما نتعلق بالبعض
نحبهم بصدق نخلص لهم
وهم كذلك تترابط قلوبنا ولا نعد قادرين على فراقهم
نتمنى وجودهم معنا فى كل حين
ولكن دوام الحال من المحال
يأتى يوم يقولون فيه وداعــــــــا
ويالها من كلمة قاسية
تحترق القلوب حزنا عند سماعها
وتذرف العيون دموعا عندها
أناس قابلناهم وسنفترق عنهم لا ندرى متى ستكون العودة
ايضا عندما تكلمك احداهن ممن سكنت فى القلب :رحمة لن أدخل مرة اخرى
ياااااااااااه موقف صعب
لا اريد توديع احد فى حياتى لا احب هذا ولا اريده ولكنها الحياة
بعد اشهر ستسافر اختى لزوجها
رغم انى اريدها ان تتزوج وفرحة لذلك ولكن اتمنى الا يأتى هذا اليوم
بكيت بشدة بعد كتب الكتاب لانى وجدت ان الامر بات حقيقة ولابد منه
لا اريد ان يأتى اليوم الذى اقول فيه لها وداعـــا ....
لا اصدق انى سأستيقظ يوم ولا أجدها فى السرير الذى بجانبى
لا اصدق انى لن اسمع صراخها وضحكاتها المزعجة ترن فى شقتنا
سأفتقد مشاغبتها ولعبها ومرحها ومضايقتها لى فى كل آن
آآآآآآآه ولكنه الوداع
ولأننى ليس بإمكانى منعه
فسأكتفى بان اقول لمن يودعنا لا تنسى رفاق احبوك
ومهما باعدت بيننا المسافات وفرقتنا الدروب سنبقى أحباب